- 416 -

1405. Dez. 17. Liegnitz.

Herzog Ruprecht giebt der Stadt das Privileg, alle auf ihr haftenden Erbzinsen wieder zu kaufen.

Wir Ruprecht von gotis genaden in Slesien herczog vnd herre czu Legnicz bekennen vnd thun kunt offinlich mit desem briue, das wir von vnsir wegen, vnsir erben vnd rechten nachkomen erbhern czu Legnicz wegen, geheisen, geboten vnd bevolen haben vnsir getrawen burgermeister vnd ratmannen vnsir stad czu Legnicz, dy do yczunt sein adir hernoch in czukunfftigen czeiten doselbist werden, das sie sullen allen erbczinsze, dy do vff vnsir stad Legnicz von langen geczeiten bisdoher gestandin habin, widerkeuffin, wie sie mogen, vnd sullen an dy selbe stat andir czinse vnd renthe czu widirkauffe adir czu leipczinsen, wy sie mogen, andern lewten vorkeuffen, der sy auch yczunt vnd andir vnsir burgermeister vnd ratmanne, dy do vor en an dem rate gesessen haben, eynes teyles widerkaufft haben vnd andir czinse vnde renthe, beyde czu widirkauffe vnd czu leybczinsen von vnsirm geheyse, gebote vnd bevelungen dorumb vorkaufft haben, vnd was dy selbin vnsir burgermeister vnd ratmanne, dy do yczunt sein, adir hernoch in czukunfftigen geczeiten gekorn werden vnd auch dy vor en an dem rate gesessen haben, wenn das ist gewest, derselbin erbczinse wedirkaufft haben vnd an dy selbin czinse vnd renthe vorkaufft haben, das wir en das volle vnd gancze macht gegebin habin, stete czu haldin. Des czu sicherheyt haben wir en desen briff mit vnserm ingesigel lassen vorsigeln czu Legnicz, nach Cristus geburde vnsirs herren virczenhundirt jar, donoch im fumfften jare, am donrstage vor sant Thomas tag, des heyligen zwelffpoten.

Bitschens Privilegb. f. CXLIII. — Dessen Zinsb. f. 36.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866